زفرات قلب

السلام عليكم

هى بعض زفرات خرجت من قلب

خرجت لأنها تريد ان تخرج ولم ترى وتجد متسع لها غير هنا

حيث يحلو المقام ويطيب

وحيث تجيش النفس بما فيها

وتخرج ما بها

عندما تجرح قلبا وانت لا تدرى فتلك مصيبة

وعندما تجرح قلبا دونما تدرى فالمصيبة أعظم

علمتنى هذه الحياة ان لا عيش للضعفاء

ولا عيش بها لمن لم يعرفوا انها دنيا

دنية حقيرة لا تبرح الا ان تكون كذلك

علمتنى ان هل جزاء الاحسان الا الاحسان

ولكنها ايضا علمتنى ان هذه قاعدة كثير من شذ عنها

علمتنى الحياة الا اتغير واغير ما اراه فى نفسى حسنا

وان تعامل التاس بضده طالما ان له اصل ومرجع

علمتنى الا احكم على الناس وعلى الحياة بمعايير الناس

فلطالما قد فسدت هذه المعايير

وارهقتها الدنيا وغيرتها

بل طمستها وجعلت من الحق باطلا

ومن الباطل حقا

علمتنى الحياة ان اتمسك بما تعلمته وما فطرت عليه

والا اغيره الا بالقدر الذى يتناسب ان اتعامل به مع من يفقده

علمتنى الحياة ان الانسان مخير مسير

ولكنها حين يقصر ويهمل يتذكر انه مسير وفقط

علمتنى الحياة ان لا عيش الا عيش الاخرة

علمتنى الحياة ان لا فرق بين عربى اعجمى الا بالتقوى

علمتنى الحياة الا احكم على الناس بمظاهرهم ومن اول نظرة

علمتنى الحياة الا اكون خبا والا اسمح للخب ان يخدعنى

علمتنى الحياة ان لم اغير فى الناس فلا اتغير بمساوئهم

علمتنى الحياة ان احنو وان احب وان اقسو احيانا

كلا بقدره وكلا فى مكانه ووقته

علمتنى الحياة ان اتعلم منها بقدر ما استطيع

والا اتكبر على ان اتعلم

وان اقتضى بكل من يعلمنى حرفا وعلما

علمتنى بان الكثير يحتاج لكلمات حانية

ومعاملات رقيقة مهما كان ومهما بدى عليه غير ذلك

علمتنى ان النوايا الطيبة وحدها لا تنفع

فلا بد ان يتبعها عمل

فالناس لا ينتظرن منا الا العمل

ولا تنفعهم النوايا بشئ مهكما طابت

علمتنى الحياة ان اتعلم ان اجود نيتى بعمل

وان اتعلم كيف احيلها عملا

علمتنى الحياة الا اظهر من نفسى غير ما فيها

وعلمتنى انا اخاف ان يحسن الناس بى الظن اكثر مما يجب

وعلمتنى انا لم يتغير الناس للخير

اسعى ان اغيرهم واصحح لهم مفاهيم حسبوا انها لب الحياة

نسأل الله ان نكون من الانقياء ومن الاخفياء

الذين اذا حضروا لم يعرفوا

واذا غابوا لم يفقتدوا

يغيرون فى الدنيا لربما

عظم اسمهم ام لم يعظم وعلى شأنهم او لم يعلو

يسمون بانفسهم ومن حولهم

ولا يرضون لغير هذا الطريق بديلا

علمتنى الحياة الا احتكر رأيا ولا حقا لنفسى

علمتنى ان الحياة تجارب وعبر

وان الحياة معبرا للاخرة لا اكثر

علمتنى ان كفاية كده خصوصا انى باتكلم من سايبر وعايز امشى

:))

الامارات من الداخل

السلام عليكم

اعتقد ان قليل ما بنسمع معلومات عن الدول من الداخل يعنى ممكن نسمع عن مجرد معلومات عامة عنها او سمات ولكن قليل ما بنتكلم عن حاجات سواء شفناها او سمعناهااو تنقل كما نراها صحيحة

مش هتكلم عن معلومات عن الامارات ولكنها هتكلم عن حاجات عايشتها ولمستها من هذا المجتمع

اولا معلومة على جنب ان الامارات تضم اكثر من 216 جنسية مختلفة

وان كل هذه الجنسيات تتعايش فى بلد واحدة ويحكمها قوانين واحدة مش شئ سهل

بل انك تجبر كل هذه الثقافات على قوانينك وقواعدك مش سهل هين

للاسف فى ظل هذه الجنسيات ضاع كثير من هوية المجتمع الاماراتى نفسه

ولم يستطع المجتمع الاماراتى ان يضع بصمته على هذه الثقافات بل تأثر هو

اولا نتكلم عن مجتمع الامارات

اللى بيختلف عن اى مجتمع خليجى اخر والشخصية نفسها تتميز بالخلق العالى والتواضع عكس كثير من الشخصيات الخليجية الاخرى

واللى بيعجبنى اوى فى هذه البلد هى استثمارها بكل ما اوتيت من امكانيات فى عمل المزيد من اجل الشعب او من اجل نمو البلد

يعنى مش مجرد ثروات بترولية جتلهم فاستخدموها الا ان تنتهى وفقط

لا استثمروا كل ما اوتوا من ثروات فى تطوير البلد

مش مجرد مشاريع ولا مجرد خدمات بل حتى قوانين وذوقيات

يعنى بالفلوس ممكن تعمل مشاريع ممكن تعمل انجازات تبنى تعمر بس تغير من سلوك ناس

اعتقد ده اهم انجاز اتعمل فى البلد دى

القوانين فى هذه البلد صارمة جدا وبتطبق كما وردت

وده عامل فى المجتمع حالة غريبة من التوازن ومن النظام ومن الجمال

جمال الخلق وجمال السلوك

يعنى القوانين اكيد بتخترق بس بنسب ضئيلة

بس القوانين وصرامتها دى عملت من الناس شئ جديد وغيرت فى سلوكهم

واصبحت عند الناس عادة سواء فيه امامهم شرطى ام لا

وفيه هنا استغناء عن وجود الشرطة بشكل كبير بس بالتاكيد موجود

ولكن البلد مذاعة على الهواء مباشرة :) فيه كاميرات فى كل المناطق تقريبا وكل الميادين

وده عامل احترام شديد للقوانين والعقوبات هنا شديدة جدا

ولكن لانها بتتنفذ بجد وبدقة ده عامل احترام شديد ليها مفيش استثناءات ولا ربنا يخليك لينا يا بيه :) والحركات دى

وحتى لو حصل استثناءات بتبقى فى حدود ضيقة جدا ولحدود مش بتبقى مفتوحة

يعنى لو اتكلمنا عن المرور مثلا

تعانى الامارات من ازدحامات مرورية فظيعة جدا خصوصا الطريق من الشارقة لدبى

اللى بمر عليه كل يوم ذهابا وايابا فى طريق لا ياخد نصف ساعة ولكن مع الازدحام ياخذ ساعة ونصف تقريبا

ولكن اجمل ما فى الامارات تحس كده ان الحكومة مع الشعب مش ضده

وانهم مش بيعملوا القوانين دى انتقاما ولكن تنظيما

يعنى مثلا الشرطة وده شئ ضفته بنفسى لو عربية غرست فى الرمل يشدوها

ده فى مرة كنت بسال شرطى عن مسجد وكان شارع رايح جاى عربيات قالى فى الناحية التانية

بس خلى بالك وانت بتعدى :) كنت عايز ارمى نفسى فى حضنه واعيط :))

لا صحيح فيف فرق كبير بين انك تعمل قوانين عشان تنظم حياة الناس وتعمل قوانين تذل بيها الناس

وتغير وتعدل وتشيل لانك عملت قانون كده وخلاص يحل مشكلة ويبوظ حاجات اكتر منها بكتير

يعنى انك تعمل بلد من اول وجديد وتنظمها وتعمل بدائل لكل حاجة ولكل ظرف

البلد هنا يا دوب عمرها 36 سنة بس.. اللى اتعمل فيها مقدرتش بلاد تعمله فى مئات السنين

والعملية مش فلوس بس مع اهميتها ولكن فى التخطيط وفى ارداة انك عايز تبقى بلدك بجد احسن بلد فى الدنيا مش مجرد شعارات

مصر تستاهل اكتر من كده وتستاهل تبقى احسن من كده وده اللى يزعل الواحد ان مش دى مكانتها الطبيعية

كل ما بنشوف حاجة هنا بنتحسر عن الوضع اللى وصلتله مصر.. مصر حكومة وشعب

وتبين لينا اد ايه ان الحكومة لو بجد نفسها تعمل حاجة هتعمل مهما كانت ظروفها

بجد مهما كانت ظروفها .. ارادة التغيير ممكن تعمل كل شئ مهما كانت مقدرات البلد وظروفها التاريخية او الآنية

جميل ان البلد تبقى متصلة بحكامها وحكومتها مش منفصلة عنهم

يحسوا بجد انهم جزء من البلد مش جزء جه يحكم البلد

بقول الكلام ده عشان بجد مصر تستاهل احسن من وضعها ده بكتير

وعن بعض الامثال من التقدم هنا مروريا ممكن نتكلم بسرعة عن مثلا

وجود اماكن مخصصة بجد للمارة وعند الاشارة بيكون فيه زر لو عايز توقف السيارات وبيبقى شغال :)

والعجيب انهم بيقفوا :)) وفى بعض الشوارع لو المارة عدوا مثلا فى مكان به كوبرى مشاة تفرض عليهم غرامات او انهم يمشوا بين العربات فى مكان فيه تقاطع او صنية كده كما نسميها

وبمناسبة الحديث عن المارة فبالطبع يوجد دور للبلدية هنا فى النظافة ووجود غراات على من يلقى قمامة سواء من المارة او من راكبى السيارات وبتصل الى ارقام كبيرة بل السيارات المتسخة تفرض عليها غرامات

وتوجد فى بعض الاشارات لوحات الكترونية تنبئك عن احوال الطريق واذا كان فيه حادث مثلا متسلكش الطريق ده او اليوم فيه غيوم امشى بحذر شوية وينزلوا يوصلوا الناس :)

وعن وجود اماكن مخصصة للاتوبيسات والاتوبيسات بين الامارات وبعضها لا تقف الا فى حالة انها تنزل راكب ومش فى اى مكان وفيه اتوبيسات داخلية داخل كل امارة

حتى التاكسى ليه اماكن محددة يقف فيه ومش ينفع توقفه فى اى مكان

عانينا كتير معاهم لدرجة كنا بنقف ساعات ومحدش يرضى كنا بنعمل جرائم مرورية اول ما جينا :)

نعدى شارع نشمى والطريق ماشى ونوقف تاكسى من اى مكان

وبالطبع التاكسى بيبقى فيه عداد اليكترونى مش انت وذوقك يا بشمهندس :)

حتى الحلاق ليه تسعيرة ممكن تكون اغلى من مصر بكتير اوى ب شئ منظم وخلاص

يعنى هنا كل شئ غالى جدا بس منظم جدا

والموضوع قد يكون ليه علاقة صحيح بغنى البلد بس والله اللى عايز يعمل حاجة وبيتعب نفسه عشان يعملها اكيد هيعملها ربنا كفل لنا ذلك بس المهم الارادة والاخلاص بجد

وركوب الاتوبيسات بيبقى بطابور مش اللى يلحق والتاكسى فى المولات والمناطق المغلقة برضه بطابور ودور مش انت وسرعتك :))

ومعاملة الناس فيما بينها نفسها شئ عجيب مهما كانت الجنسيات

الا انهم تطبعوا بطبع هذه البلد مش لازم بثقافتها بس بقوانينها والسلوكيات التى فرضت عليهم

اما ان تكلمنا عن التدين فهو فى امارة مثل الشارقة كبير جدا ما شاء الله

حتى ان المساجد فى الصلوات اليومية تملئ بما يشبه صلاة الجمعة عندنا

وينتظر الناس بعد الصلاة لصلاة السنة برضه بنسبة كبيرة

وتتميز الشارقة بكثرة المساجد يقال انها بتعمل كنوع من التنافس بين الوجهاء

يعنى واحد يعمل مسجد التانى يعمل احسن منه :)

فيه بالتاكيد عيوب كتير فى المجتمع الاماراتى

منها دبى :))

اللى مع انها تقدمت عن باقى الامارات فى اشياء كثيرة الا انها تاخرت عنهم اخلاقيا بشكل كبير جدا وملحوظ وعلنى وكتير ومبالغ فيه وملوش مثيل ويغيظ :))

شكل كل اللى يشوفه يقول انى دبى مقدمة على مصيبة وازمة وبالفعل بدأت فى ظل الازمة الاقتصادية اللى تضررت منها دبى بشكل كبير جدا اثر على كل مشاريعها بشكل كبير جدا والسياحة فيها

دبى اكثر تقدما فى كل الامور من حيث المشاريع او من حيث القوانين وتطبيقها ومن حيث الامكانيات ومن حيث حتى الانجاز فى الامور والمصالح الحكومية عن غيرها من الامارات

يعنى الشارقة برغم نسبة التدين اللى فيها الا انها للاسف متخلفة عن دبى فى حاجات كتيرة

وده شئ مؤسف طبعا كل امارة تتفوق عن بعضها من حيث القدرات المادية وغيرها

الا زى ما اتفقنا ده مش مانع من التقدم والرقى كمان

وادينا عايشين وبنشوف وهنحكى ونتعلم ونتخلق ان شاء الله بهذه الاخلاق

اللى اللقاء

تاج دبوى

مع اول تاج اجاوب عليه من دبى

السؤال الاول : بدءت التدوين امتى ودخلت العالم دا ازاي ؟

ايه الاسئلة القديمة دى :) انا بدأت التدوين بالظبط 19/4/2007 هذه هى البداية الحقيقة انما كنت عملت المدونة قبلها بفترة ومكنتش بتابعها انما يعتبر اول بوست بدأت منه المدونة بداية حقيقية كان فى هذا التاريخ وسبحان الله كان بيتكلم عن الاغانى وبسبب الاسم بتاعه لسه نشط لحد دلوقتى نظرا لان ناس كتير بالطبع بتعمل بحث عن الاغانى يعنى كنت بعيد النظر ما شاء الله عليا :))

وكنت دخلت هذا العالم كما ذكرت من قبل عن طريق اخ وصديق صاحب مدونة شاب فقرى اللى بعد عن مدونته بقاله فترة او بقى مش بيتابعها علطول معرفش ليه بس سبحان الله جميل ان يبقى فيه عالم كده ويحتوى على حاجات كتير وبشر وعلاقات وبشر وتبقى جزء منه سبحان الله حقا يعنى لو تأملنا ازاى ان البشر فى كل بلد او قرية او او يعنى بتبقى بينهم علاقات وكمان فى النت يعنى اقصد حاجة كده حلوة :) عشان اللى مفهمش اقصد حاجة.. ثم ثينج اذ جود :)

السؤال التاني : ايه كان انطباعك فى البداية ؟

مكنش فيه انطباع كبير يعنى لانى مكنتش اعرف عن العالم ده كتير بس كنت اللى اعرفه عنه انه يشتهر بجانبه السياسى بشكل كبير انما الجوانب الانسانية تعرفت عليها بعد دخولى فيه وعجبنى فكرة ان الواحد يبقى ليه مدونة يعبر فيها عن كل ما يجيش بصدره بالصورة اللى هو شايفها يعنى يتكلم فى سياسة فى دين فى حياته الشخصية اهو منبر من لا منبر له :) ومن حقه يقول اللى عايزه طالما انها مدونته والناس بتدخله خصيصا عشان تتابع الى بيكتبه طبعا مع وضع كل واحد على نفسه الشروط والمحاذير وكل هذه الامور

السؤال التالت : من اكتر من تحب تعليقه على البوست الجديد ؟

والله بالتاكيد يعنى بعيدا عن التدوين وعن اى شئ يعنى بيبقى فى وسط المدونين فيه ناس بتستريحلهم وتعلق عندهم ان شاء الله لو كاتبين ايه ودى ملهاش معيار دى عملية تلقائية كده بتيجى لوحدها يعنى ملهاش معيار وبحب اوى اعلق اكيد اللى بيلبى احتياجاتى وبيلفت نظرى

وبحب اعلق على المواضيع اللى خارجة من القلب تحس ان الواحد مش هو اللى كاتبها ولكن تكتب بروحه

وبحب اعلق عند الناس اللى احس انهم بشر اوى بشر جدا بشر بجد

السؤال الرابع : ايه اهم حاجة اتعلمتها فى عالم التدوين ؟

اهم حاجة اتعلمتها من التدوين هى فقة الاختلاف يعنى اتعلمتها وأود انها تنتشر بين كل الناس واتكلمت عنها كتير بشكل ممل كده لانها للاسف مفتقدة بشكل كبير جدا ومحتاجين ليها جدا لان بيها هينصلح امور كتيرة جدا لانها مدخل لما بعدها مدخل لكل خير لان الواحد لو حط بينه وبين الناس حائط صد ومسمعش منهم او اعتقد انه هو فقط اللى على صواب ازاى هيغير ويتغير ويطور نفسه ووو

وفيه حاجة مهمة تعلمتها من التدوين وهى كانت نقصانى بشكل كبير وهو انى اخالط ثقافات مختلفة واعرف ان البلد بخير وان مش بس الاخوان هما اللى بيصلحوا وان فيه كتير بيحبوا البلد مش معنى كده ان الاخوان بس كنت فاكر انهم بيحبوا البلد دون غيرهم لا من ذاق عرف يعنى الواحد لما يشوف غير لما يسمع ان فيه شباب كده

وتعرفت عن طريق التدوين عن افكار مختلفة وان الافكار او الاتجاهات دى مش كل اللى فيها ماشين بدماغ واحدة اقصد ان زى ما فيها كويس فيها وحش قد يكون الوحش للاسف هو اللى على السطح وواضح بس فيها كتير كويسين

وعلى خير

واتعلمت من التدوين انى احكى واتكلم وافضفض واخرج ما بداخلى حتى كنت كاتب فى بداية المدونة تحت اسم المدونة

عندما تخرج ما بداخلك فى وش البنى ادمين :)

وده من اهم ما تعلمته فى التدوين واتعلمت انى اقيم ما اؤمن به وما اعتقد وما امارس وما افكر هل هو صواب واذا كان صوابا فما مدى اهميته وما مدى مطابقته للواقع

يعنى ممكن ناس تعيش سنين طويلة ومعجبين بما يرونه وحاسين انه مكسر الدنيا والناس مستنين كلام زى ده وان ازاى الناس لسه مقرتش الى فى دماغى وان انقاذ البشرية على ايدى وهو كل اللى فى دماغه لا شئ

السؤال الخامس : ايه اكتر حاجة كرهتها ؟

اكتر حاجة كرهتها وهى سوء الاختلاف فى الرأى وان الواحد مش يعرض رأيه باخلاص لمجرد انه مختلف يعنى فيها ايه لما اكون بحب حد اوى واختلف معاه وبعدين اتفق فى نقاط كتيرة وليه اذا كنت بحب حد مختلفش معاه عشان مزعلوش

وليه لما اكون مختلف مع حد فكريا يبقى عدو ليا وليه مقبلش من ناس حاجات وارفض اخرى

وليه مقلش على الحق انه حق حتى لو طلع من غير اهله

واكتر حاجة اكرهها هى الثقافات والافكار الشاذة يعنى بكرهها فى نفسى مهما كانت ثقافة او طريقة الحوار معهم بس بكرهها وخلاص

يعنى مثلا حد بيذم فى الاسلام مثلا انا صحيح مليش عليه سلطان بس بالتاكيد هكرهه واكره فعله

واكتر شئ بكرهه وده ممكن يضايق ناس كتير ان التعليقات فى المدنات بقت من قبيل اذا علقت عندى هعلق عندك :)

هو طبعا كل واحد حر يعلق فين وميعلقش فيه يعنى انا مثلا من فترة طويلة جدا عندى حالة كده مش بعرف اعلق عند ناس كتير كنت بعلق عندهم معرفش ليه ده حتى منهم اخويا :) وبقيت بعلق بشكل قليل جدا وطبعا خصوصا بعد السفر فالواحد مش فاضى بشكل كبير يا دوب بنزل بوست وارد على التعليقات

المهم قصدى فى هذه الثقافة اللى ممكن ابقى غلطان فيها حتى كنت بتكلم مع مدون وكان بيقلى لما غاب عن مدونته فترة رجع وعلق عند الناس من قبيل انه يفكرهم بيه او يعلقوا عنده فمحبتش هذا الفعل يعنى انا اعلق لما الاقى انى عايز اعلق مش عشان حد ييجى يعلق عندى اعتقد دى ثقافة صنعناها بايدينا للاسف

السؤال السادس : حاسس ان التدوين له تاثير؟

بالتاكيد الدوين ليه تأثير انما تاثير محدود نظرا لان اولا عالم الانترنت فى مصر مهما كبر فهو ليه حدوده ومش كل الناس عندها كمبيوتر اصلا ومن اللى عندهم كمبيوتر مش كل الناس عندهم نت ومن اللى عندهم نت مش كل الناس عندها ثقافة استخدام النت ومن بين الناس دول فيه اللى بيتابع المدونات :) يعنى نسيب التدوين كده بالذوق :))

يعنى اكبر مدونة فى تاريخ البشرية نلاقى عدد زوارها ممكن يكون عدد زوار موقع كبير فى كام يوم

ده من حيث العدد والتاثير انما من حيث ارتباطه بالواقع فاعتقد مثلا فى احداث اضراب 6 ابريل وما حدث انه ممكن يكون اثر كشرارة بدء فقط بس محصلش اضراب بفضل المدونات او النت عامة اقصد ان ما يحدث فى المدونات اذا لم ينزل الى ارض الواقع الذى يحياه الناس سيظل التدوين مجرد عالم صغير وضيق وذو تأثير محدود .. مجرد عيال عمالة تزعق وخلاص وتفضفض..

ده ممكن من الناحية السياسية انما من قبيل الافكار وعرضها فاعتقد نسبة التغير اللى حصلت لناس بسبب المدونات مش كبيرة اوى يعنى ممكن توضح حاجات ممكن تنير مناطق مظلمة بس تغير بشكل جذرى قد تحدث ولكن بنسبة محدودة

تهدي التاج دا لمييييييييييييييييييييييييييييييييييييييييين ؟؟؟؟؟؟؟؟؟؟

وغلاسة بقى مش ههدى التاج لحد :) هنوءده حتى لا نرى له اثر ويموت ويندثر ويتحلل ويذوب :))

الزواج الالكترونى .. 2

السلام عليكم

عدنا مرة اخرى

ما شاء الله التعليقات كانت مثيرة على البوست الماضى عشان كده حبيت انى اكمل وبالفعل تولدت لدى اجزاء كانت مختفية فى البوست الماضى واضاف المعلقين اجزاء اخرى

ولكن آثر بعض المعلقين ان يتركوا رأيهم بدون ابداء اسباب

وتطور الامر مع البعض ان طلب ان يتم عمل دراسة ووضع تصور للموضوع بشكل كبير

بسم الله

اولا: من الايجابيات التى ظهرت مجددا فى الموضوع انه مثل هذا الزواج ينفع مع بعض الشخصيات ذات طبائع معينة يعنى من الممكن ان تكون طبائع منطوية جدا او طبائع انعزالية عن المجتمع ويكون من الصعب عليها ان تجد شريكها فى الحياة فى الواقع فتلجأ الى الزواج الالكترونى كحل قد لا يكون له بديل

والامور تقدر بقدرها يعنى مينفعش نرفض فكرة بشكل كلى قد تنفع مع اشخاص ولا تنفع مع الاخرين وفشلها مع اشخاص لا يعنى فشل الفكرة نفسها ولكن قد يكون فشل التطبيق

انا على فكرة حيادى فى الموضوع بين القبول والرفض

ثانيا : نقطة سلبية واراها سلبية جدا وهى هل الشخصية ذات الفكر المميز التى اتعامل معها خلف الاسوار الالكترونية هى ذاتها نفس الشخصية التى سأتعامل معها فى الحياة الواقعية

والنقطة دى بتنقسم لجزئتين

اولها : ان تكون هذه الشخصية مخادعة اى تظهر غير ما تبطن يعنى مغرضة قد يظهر هذا لغرض وقد يكون الزواج هذا من بعض اغراضه ظانا انه يريدها بالمواصفات التى يريدها لانه يعرف انها خير له.. حتى وان لم يتخلق بها

وثاينها : انه قد يكون يحمل افكار ومبادئ عظيمة ورائعة ومثالية ولكنه فى تطبيقه لها مقصر قد ينادى بمبادئ عليا وقويمة ولكنه ينفذ منها القليل يؤمن بها نعم تملئ حياته ووجدانه نعم ولكن هل يحمل تلك الهمة حتى يؤديها كما يجب فيتولد عند الطرف الاخر نظرة ان هذا شخص مثالى وليس له نظير فهو ينادى بكذا ويضحى ويعمل ويجاهد

ولكن ميدان القول غير ميدان العمل فبينهما بون شاسع

هو غير كاذب او مخادع فهو لا يتحدث عن امجاده وبطولاته ولكنه يتحدث عن افكاره فحسب

هو يؤمن بها حقا وتتملكه ولكنه غير قادر على ان يتمها كما يجب

فعند التعامل وعند العيش وعند الاحتكاك يظهر وتظهر هذه الفجوة بين هذه الصورة التى فى ذهن كلا منهما وبين التعامل والمعيشة والواقع الحياتى فتحدث الصدمة بين المأمول وبين الواقع

ثالثا : نقطة اخرى سلبية وهى وهى كيفية تقبل البيت من الطرفين للموضوع لهذا العريس او الزوجة الالكترونية

مش كل الناس عندها اصلا معرفة بما يحدث داخل الاسوار الالكترونية فهو يتفاوت ما بين شات الى تدوين إلى وإلى

وبعضها يكون فى حدود الشرع والبعض خارجها والفكرة نفسها قد تكون مستغربة لما وكيف واشمعنى :)

وياتى صوت معارض ليقول ان الزواج التقليدى ايضا له نفس المشكلة من حيث ان الشخصية مجهولة وقد تظهر غير ما تبطن وقد تتجمل وتظهر فقط ما تريد ان تظهره وتخفى ما تريد وهذا رأى صحيح وبالفعل يجمع كل من تزوج انه لا يعرف الطرفين بعضهما البعض الا بعد الزواج مهما كانت علاقتهما وطريقة الزواج تلك حتى لو كانت عن حب

وتأتى مشكلة فى الزواج التقليدى ايضا انه عندما يطلب شخص ما مواصفات معينة دون ان يعرفها او يخالطها بالشكل المناسب فتصبح مجهولة عنده تماما لا يعرف الا القليل عنها وعن بيتها معلومات بدائية حتى ان كان لها قرينات يعرفهم فأيضا لا تظهر شخصيتها الا مع اقرب الاقربين بالتأكيد فتأتى اهمية الزواج الالكترونى من حيث معرفة الفكر واستنباط ما وراء الكلمات فبالرغم من هذه الاسوار الا ان بالتأكيد كل منا يبقى لديه انطباع عن المدونين الاخرين ليس من ما يكتبون ولكن من وراء الكلمات ايضا

ويأتى حل وسط جاء بعد مداولات ومباحثات واستشارات تعليقاتوية :)

بأن يكون الزواج الالكترونى يأتى عن طريق الاختيار وفقط ويأتى من بعده عدة خطوات وهى الخطوات العادية فى اى زواج مثل السؤال عنها وعن اهلها وباقى الخطوات وايجاد وسيط الكترونى او حقيقى :) يمهد لمثل هذه الخطوة

ويا بخت من وفق راسين فى الحلال وهنيالك يا فاعل الخير والثواب وحسنة قليلة تمنع بلاوى كتير :))

ومن قدم شئ بيداه التقاه صحيح :))

ويبقى ان فيه نقطة مهمة فى الزواج الالكترونى اتفقنا عليها ايضا من خلال التعليقات انه من الصعب واحد يعجب بواحدة الكترونية ويقدم على ذلك من قبل ان يؤدى الخطوات التى ذكرناها مثل السؤال ومثل الشكل والقبول وكل الجزئيات التى تقع فى الزواج العادى وعليه ان يجد الوسائل المناسبة لذلك

ومن هنا تأتى نذكر حديث رسول الله ان "ثلاثة كان حقا على الله ان يعينهم..." منهم الناكح يبغى العفاف

وتأتى نقطة السؤال عن الطرف الاخر من حيث حالته المادية والاجتماعية وظروفه واخلاقه وبيته وكل شئ

فقد يحدث ذلك الانبهار الالكترونى بالشريك المزعوم الذى يسيطر على كل فكر وكل عقل ولا يدع لهذه الخطوات الهامة والخطيرة موقعا فبعد ان يزول هذا الانبهار لا يبقى الا هذه الفجوة التى صنعناها بايدينا

وانتقلنا فى الحوار الى نقطة وجود الوسيط وارى انه يجب ان يكون وسيط حقيقى غير الكترونى حيث ان الالكترونى مهما كانت درجة قربه من الالكترونياية برضه مش هيبقى قريب بس الوسيط الحقيقى اللى من لحم ودم ده :)

هيختلف اكيد من حيث احتكاكه بالضحية :)) وتعاملها ومعاها وكده

ويبقى ان هناك بعض الخطوات التى ذكرناها التى تحيل من هذا الزواج الالكترونى الى زواج واقعى ارى ونرى انه من غيرها سيمر هذا الزواج ولكن بنجاح او بفضل هذا ما لا يعلمه احد الا الله

ويبقى نقطة مهمة جدا خالص اوى جدا بشكل غير طبيعى يعنى :))

الا وهى نقطة تجاوز الحدود فى التعامل بين الزوجين الالكترونين المزعومين يعنى من حيث طريقة التعارف وطريقة التواصل وحتى اذا كانت فى المدونات وبطريقة محترمة بس يبقى انه بعد حدوث هذا الاعجاب الالكترونى كيف ستكون لغة الحوار وطبيعة التعامل بل كيف لها ان تأخذ شكل حيادى الى ان تصل الى شئ ما

يعنى بعد كل الخطوات الى تم ذكرها قبل دخول البيت يجب ان تظل العلاقة كما هى بدون اى تطورات سواء فى المشاعر او التعامل لانه يظل انها علاقة ما زالت غير مكتملة وتحتمل النجاح او الفشل وتحتمل ان تكتمل او لا

فلا يجب ان يعول اى منهما على الاخر بالشكل الكبير حتى لا يتعرض لصدمة ويكتم اعجابه فى قلبه الا ان يحدث شئ يدعم هذا الاعجاب ويكون البادئ بالتاكيد فيه الزوج الالكترونى

وقبل كل شئ وبعد كل شئ يبقى ان اختيار الله وقدره لنا فوق كل شئ ولا نعلم اين الخير يكون فلربما يكون فى شئ مجهول لا نعلمه ولا ننتظر منه خيرا اصلا ويأتى من وراءه خيرا عظيما

الزواج الالكترونى

ظهر الزواج الالكترونى تحديدا بعد ظهور الانترنت :)

وقد نشأ فى ظروف خاصة

والزواج الالكترونى كأى شئ فى الدنيا له عيوبه ومميزاته

ربما تكون نشأته لعدة عوامل وظروف

قد ينشأ بسبب ظروف للطرفين من احداها مثلا

عدم القدرة على البحث او عدم الاختلاط المتبادل بشكل كبير او باى شكل ما

وقد ينشأ فى وسط الملتزمين لنفس السبب وهو عدم الاحتكاك والتعامل مع الجنس الاخر

ويمكن نقسم هذا الزواج كذا قسم

فالزواج عن طريق مواقع الزواج يختلف عن طريق الشات يختلف عنه فى المدونات

فعن طريق مواقع الزواج تبقى الشخصية مبهمة للغاية ولا يظهر منها الا ما تريد ان تظهره

ولكن عن طريق المدونات فيبقى ان الوضع يختلف قليلا

يعنى كل واحد فى مدونته بيعبر عن نفسه وبيتكلم بكل اريحية

وفيه اللى بيكتب عن ظروفه ومشاكله واحواله اليومية

وفيه اللى بيظهر من كتابته تفكيره ونمط حياته

ولكن يبقى ان الواحد مهما كان صادق فى كلامه وكتابته

ان اللى بيظهر منه فى المدونة او النت عامة بيكون الجزء المثالى فقط

او على الاقل الجزء الايجابى ولكن من الصعب الواحد تظهر عيوبه اون لاين

مش عشان هو بيخفيها وبيحاول ويحتهد على كده

لا لانه طبيعى ان الواحد بيتودد للناس وبيبقى حريص فى تعاملاته

فمثلا كلام اليوم العادى مش نفس الكلام اللى بنقوله فى المدونة

اقصد ان لغة الخطاب تتغير ولو قليلا

ويبقى ان زواج النت والمدونات فيه جزء كبير عقلى يعتمد على التقارب فى الافكار

وفى الشخصيات وفى التعامل مع الامور فمن هنا يأتى الانجذاب

اما الجزء العاطفى بالتأكيد موجود ولكن يأتى فى الميل وفى القبول

اما من مشكلات الزواج الالكترونى وهو عدم رؤية الطرفين لبعضهما البعض

بشكل او بأخر ودى ساعات بتحقق وساعات لا حسب الظروف

ونجد ان هذه النقطة مهمة جدا للطرفين مش لطرف دون اخر

لان بالرؤية يحصل القبول ومش لازم تكون المرأة بالغة الجمال او الرجل وسيم جدا

بس نقطة القبول مهمة جدا كما قال عنها الرسول اذا نظر اليها اسرته

ومش المقصود بها انها تكون بهئية معينة فمعايير الجمال مختلفة

ولكن المقصود بها الراحة النفسية وده للطرفين

يعنى اعتقد ان اجمل ما فى الزواج هى تلك النظرة المتبادلة

الفطرية النقية الجميلة الغير مفتعلة

يبادرها بابتسامة فيجد منها اخرى دون ان تفكر

ولكن بالنسبة للملتزمين يأتى دور الزواج الالكترونى بوجهة نظرى

كحل عملى ونافع للكثير فهو يقطع اشواط كثيرة

من الصعب ان نعبرها فى الحياة العادية

فهو افضل من ان تذهب لبيت ما لمجرد انك سمعت عنه وعنها فقط

دون ان تتأكد ودون ان تدرى فكرها وعقلها ورؤيتها ووو...

الزواج الالكترونى والتكافؤ

ويجب فى حالة الزواج الالكترونى عدم اغفال نقطة التكافؤ

سواء الاجتماعى او المادى

مش كفاية بس تطابق الافكار والتوجهات وطريقة الفكر والعيش

اذا كان فيه فجوة اجتماعية او مادية كبيرة فقد تضيع كل هذه التطابقات وتنسى

ولا يتذكر اى من الطرفين الا هذه الفجوات

بالتاكيد مش قاعدة ولكن نقطة خطيرة لا يجب اغفالها

المسألة بتبقى عايزة رابط كبير يدوب اى فروقات

واعتقد رابط الدين والالتزام اذا صح حقا سيكون اقوى رابط

ولكن أى دين وأى التزام ؟؟؟

ويبقى ان الزواج الالكترونى تجربة مثل اى تجربة تحتمل الفشل او النجاح