طريقك نحو النصاحة والدءدءة

خبرات راقبتها فيمن حولى وفيمن أتعامل معهم وربما نقع فى بعضها فى أوقات

ولكنها اصبحت بمثابة قواعد حياتية عند الكثير..

تحذير : لا تتبع التعليمات التى سيتم ذكرها :)

اولا فيه نقاط أساسية لازم نتفق عليها عشان نعرف نعيش صح ونبقى مدءدءين :)

ونعرف نتعامل مع الناس كويس

.

.

القاعدة الاولى.. الا وهى الكذب

الكذب ده بيختصر لمسافات وأوقات كتيرة اوى وبيخرجنا من مطبات كتير مينفعش ابدا نقع فيها

عشان احنا مدءدءين ومقطعين السمكة وخياشمها :))

يعنى لو قلت الصدق هتستفاد ايه هيبقى شكلك وحش اوى والناس تلومك

وتبقى انت الغلطان انما بكذبة بيضة ولا خضرا هتطلع من كل ده يا كبير لا من شاف ولا من درى

خصوصا ان اللى قدامك مش هيقدر صدقك وزى زمان وكده ويقلك سامحتك جراء قولك الصدق

الكلام ده كان زمان ايام ما كانوا الناس كده يعنى بس دلوقتى الناس مبقوش كده

.

.

وفيه قاعدة تانية مهمة جدا..الا وهى اللف والدوران

يعنى ليه تقول الكلام كده من أول مرة ولما حد يسألك تجاوبه

ولما حد يطلب منك حاجة تأديها كده بكل سهولة..هى سايبة :)

لازم تدوخه شوية عشان تحسسه بقيمتك وانك عملتله عمل عظيم كانت البشرية مفتقداه

ومش هيلاقيه الا عندك انت بس

يعنى تتعب وتلف وتتبهدل نفسك وفى الاخر يقلك شكرا او حتى ميقلكش

مش حرام المجهود اللى عملته يضيع فى مجرد كلمة

.

.

وفيه قاعدة تالتة مهة جدا وهى تزيين الامور والمصائب والذى منه

يعنى ممكن تقع فى مصيبة او تسبب لناس كارثة

فلما تيجى تقلهم تعمل ايه..هتروح تقلهم عملت مصيبة او انا اسف وكده

لا بص يعنى جيبها من ناحية تانية .. ان الناس بتحصلها مصايب كتير مثلا ومشاكل

وان الدنيا فانية :)) وهناخد منها ايه ودقق اوى على النقاط الايجابية فى الموضوع

وفى الاااااااخر قلهم المصيبة بشكل لذيذ محدش ياخد باله منه

ده ممكن كمان يشكروك بعدها ويكافئوك :))

وبكده تبقى خففت عليهم الكارثة وطلعت نفسك منها زى الشعرة من العجين

ويا بخت من بكانى وبكى الناس عليا ..:))

.

.

القاعدة الرابعة.. الا وهى لازم طبعا بما انك حركات ومدءدء انك عارف كل حاجة

وصعب تعدى عليك حاجة فى الدنيا متعرفهاش

لو متعرفهاش يعنى مستكتش لازم تقول بقين كده

احسن الناس تفتكرك بنى ادم وكده ويبقى شكلك وحش :))

يعنى اى موضوع يتفتح لازم تقول رأيك وتقول احصائيات كمان

وطبعا الموضوع مش هيخلى من الكذب اللى اتفقنا انه مهم اوى وضرورى

شفت فوائدة بتكتر ازاى :))

ولو حد كدبك خلى بالك ممكن هو كمان ميبقاش عارف عن الموضوع حاجة :)))

يعنى ممكن تحلف :)) يعنى هى صعبة بس احلف وممكن وقتها يصدقك ويكذب نفسه

.

.

القاعدة الخامسة.. الا وهى اوعى تعترف بغلطك ابدا

يعنى مهما عملت مصايب ومشاكل اوعى تعترف بيها ارميها على اول واحد تقابله

واى حد يواجهك يا ترميها عليه يا اما على حد تانى يا اما على ظروف الحياة والدنيا

يعنى فيه مخارج كتير اوى والامر بسيط

بس اوعى تعترف بغلطك لان الناس مش هتقدر الكلام ده وهيستخيبوك

.

.

القاعدة السادسة..اشتم :))

يعنى هو مش لازم اوى بس برضه ليها اثار وبتعمل شغل

والله ده انا اعرف ناس ملتزمين كتير بيشتموا

بقت حلال تقريبا اليومين دول ..:)))

يعنى برضه الشتيمة بتعمل ليك هيبة وكده والناس تعرف انك مش سهل

مش لازم تشتم حد بعينه يعنى بس يعنى تشتم الظروف والدنيا والاحوال

بس أياك وسب الدين يا بنى الله يكرمك :))

يعنى لازم يبقى فيه حدود

.

.

القاعدة السابعة..اساءة الظن

ودى من أهم القواعد اللى ممكن تخرج بيها من الدرس ده

يعنى كل اللى حواليك شك فيهم لغاية ما يثبت العكس

اوعى تأمنلهم الدنيا كلها وحوش ..احنا فى غابة

واعرف انك مش بس المدءدء فيه ناس كتير سبقوك فى الدءدءة :)

وبكده تعرف تمشى فى الدنيا وتسلك امورك..وربنا يوفقك